Advertisement

International News 

ਯੂਕਰੇਨ ਦੇ ਬਾਗੀਆਂ ਵੱਲੋਂ ਫ਼ੌਜੀ

ਕਾਫ਼ਲੇ ’ਤੇ ਹਮਲਾ, 10 ਜਵਾਨ ਹਲਾਕ

ਕੀਵ, 2 ਅਗਸਤ - ਰੂਸ ਪੱਖੀ ਬਾਗੀਆਂ ਨੇ ਬੀਤੀ ਰਾਤ ਮਲੇਸ਼ੀਅਨ ਹਵਾਈ ਜਹਾਜ਼ ਹਾਦਸੇ ਵਾਲੇ ਸਥਾਨ ਨੇੜੇ ਯੂਕਰੇਨ ਫੌਜ ਦੇ ਕਾਫਲੇ ਉਪਰ ਜ਼ੋਰਦਾਰ ਹਮਲਾ ਕੀਤਾ, ਜਿਸ ਕਾਰਨ 10 ਜਵਾਨ ਮਾਰੇ ਗਏ। ਬਾਗੀਆਂ ਨੇ ਦਾਅਵਾ ਕੀਤਾ ਹੈ ਕਿ ਉਨ੍ਹਾਂ ਨੇ ਸਖਤਾਰਸਕ ਕਸਬੇ ਨੇੜੇ ਇਹ ਕਾਰਵਾਈ ਕੀਤੀ। ਹਮਲੇ ਵਿੱਚ ਮਾਰਟਰਾਂ ਤੇ ਟੈਂਕਾਂ ਦੀ ਵਰਤੋਂ ਕੀਤੀ ਗਈ ਹੈ। ਹਵਾਈ ਹਾਦਸੇ ਬਾਅਦ ਦੋਵਾਂ ਧਿਰਾਂ ਵਿੱਚ ਲੜਾਈ ਤੇਜ਼ੀ ਫੜਦੀ ਜਾ ਰਹੀ ਹੈ ਇੱਥੇ ਵੀ ਜ਼ਿਆਦਾ ਨੁਕਸਾਨ ਆਮ ਨਾਗਰਿਕਾਂ ਦਾ ਹੋ ਰਿਹਾ ਹੈ। ਲੋਕਾਂ ਦਾ ਕਹਿਣਾ ਹੈ ਕਿ ਉਹ ਆਪਣੇ ਘਰਾਂ ਵਿੱਚ ਵੀ ਸੁਰੱਖਿਅਤ ਨਹੀਂ ਅਤੇ ਮਾਰਟਰਾਂ ਦੇ ਗੋਲੇ ਘਰਾਂ ਨੂੰ ਤਬਾਹ ਕਰ ਰਹੇ ਹਨ। ਬੱਚਿਆਂ ਤੇ ਔਰਤਾਂ ਦਾ ਬੁਰਾ ਹਾਲ ਹੈ। ਜੇ ਉਹ ਘਰ ਛੱਡ ਕੇ ਸੁਰੱਖਿਅਤ ਥਾਂ ਦੀ ਭਾਲ ਲਈ ਜਾਂਦੇ ਹਨ ਤਾਂ ਰਸਤੇ ਵਿੱਚ ਗੋਲੀਬਾਰੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਅੱਧ ਅਪਰੈਲ ਤੋਂ 26 ਜੁਲਾਈ ਤੱਕ ਕਰੀਬ 1100 ਲੋਕ ਮਾਰੇ ਗਏ ਹਨ।

ਆਸਟਰੇਲੀਆ ਸਰਕਾਰ ਵੱਲੋਂ

ਕਾਰਬਨ ਟੈਕਸ ਖ਼ਤਮ


ਸਿਡਨੀ, 25 ਜੁਲਾਈ - ਆਸਟਰੇਲੀਆ ਦੀ ਫੈਡਰਲ ਸਰਕਾਰ ਨੇ ਕਾਰਬਨ ਟੈਕਸ ਖਤਮ ਕਰਨ ਦਾ ਮਹੱਤਵਪੂਰਨ ਫੈਸਲਾ ਲੈ ਲਿਆ ਹੈ। ਪ੍ਰਧਾਨ ਮੰਤਰੀ ਟੋਨੀ ਐਬਟ ਨੇ ਇਸ ਸਬੰਧ ਵਿੱਚ ਬਕਾਇਦਾ ਪੱਤਰ ਜਾਰੀ ਕਰ ਦਿੱਤਾ ਹੈ। ਸਰਕਾਰ ਦੇ ਇਸ ਫੈਸਲੇ ਨਾਲ ਆਸਟਰੇਲੀਆ ਦੇ ਸਨਅਤੀ, ਵਪਾਰਕ ਤੇ ਆਮ ਲੋਕਾਂ ਨੂੰ ਵਿੱਤੀ ਲਾਭ ਪੁੱਜੇਗਾ। ਜਦੋਂ ਕਿ ਵਾਤਾਵਰਨ ਪ੍ਰੇਮੀਆਂ ਦਾ ਕਹਿਣਾ ਹੈ ਕਿ ਸਰਕਾਰ ਦੇ ਇਸ ਫੈਸਲੇ ਨਾਲ ਪ੍ਰਦੂਸ਼ਣ ਫੈਲਾਉਣ ਦੀ ਖੁੱਲ੍ਹ ਵਧੇਗੀ ਤੇ ਵਾਤਾਵਰਨ ਵਿੱਚ ਕੁਦਰਤੀ ਤੌਰ ’ਤੇ ਆ ਰਿਹਾ ਵਿਗਾੜ ਹੋਰ ਤੇਜ਼ ਹੋਵੇਗਾ ਪਰ ਸਰਕਾਰ ਦਾ ਦਾਅਵਾ ਹੈ ਕਿ ਉਹ ਪ੍ਰਦੂਸ਼ਣ ਦੇ ਮਾਪਦੰਡਾਂ ਵਿੱਚ ਕਿਸੇ ਤਰ੍ਹਾਂ ਦੀ ਢਿੱਲ ਨਹੀਂ ਦੇ ਰਹੀ।
ਜ਼ਿਕਰਯੋਗ ਹੈ ਕਿ ਆਸਟਰੇਲੀਆ ਦੀ ਤੱਤਕਾਲੀਨ ਪ੍ਰਧਾਨ ਮੰਤਰੀ ਜੂਲੀਆ ਗਿਲਾਰਡ ਨੇ ਕਾਰਬਨ ਟੈਕਸ ਜੁਲਾਈ 2012 ਵਿੱਚ ਲਿਆਂਦਾ ਸੀ। ਉਨ੍ਹਾਂ ਦਾ ਦਾਅਵਾ ਸੀ ਕਿ ਇਸ ਟੈਕਸ ਰਾਹੀਂ ਇਕੱਤਰ ਰਾਸ਼ੀ ਆਸਟਰੇਲੀਆ ਦੇ ਸਮੁੱਚੇ ਵਿਕਾਸ ਲਈ ਵਰਤੀ ਜਾਵੇਗੀ ਜਿਸ ਦਾ ਆਉਣ ਵਾਲੀ ਪੀੜ੍ਹੀ ਨੂੰ ਲਾਭ ਪੁੱਜੇਗਾ ਪਰ ਗਿਲਾਰਡ ਵੱਲੋਂ ਲਾਏ ਇਸ ਟੈਕਸ ਦਾ ਉਸ ਵੇਲੇ ਵਿਰੋਧੀ ਪਾਰਟੀ ਲਿਬਰਲ ਨੇ ਬੇਲੋੜਾ ਟੈਕਸ ਕਹਿ ਕੇ ਵਿਰੋਧ ਕੀਤਾ ਸੀ। ਸੱਤਾ ਵਿੱਚ ਆਈ ਲਿਬਰਲ ਪਾਰਟੀ ਦੇ ਪ੍ਰਧਾਨ ਟੋਨੀ ਐਬਟ ਨੇ ਕਾਰਬਨ ਟੈਕਸ ਵਿੱਚ ਕੁਝ ਸੋਧਾਂ ਕਰਕੇ ਇਸ ਨੂੰ ਸੁਰਜੀਤ ਕਰਨ ਦਾ ਯਤਨ 10 ਜੁਲਾਈ ਨੂੰ ਕੀਤਾ ਸੀ ਪਰ ਇਸ ਦਿਨ ਐਬਟ ਸਰਕਾਰ ਸੈਨੇਟ ਮੈਂਬਰਾਂ ਦੀ ਹੋਈ ਵੋਟਿੰਗ ਦੌਰਾਨ ਸਦਨ ’ਚ ਘੱਟ ਗਿਣਤੀ ਵਿੱਚ ਰਹਿ ਗਈ ਸੀ। ਇਸ ਦੌਰਾਨ ਹੀ ਸਰਕਾਰ ਨੂੰ ਕਾਰਬਨ ਟੈਕਸ ਵਿਰੁੱਧ ਪਾਈ ਜਨਹਿੱਤ ਪਟੀਸ਼ਨਾਂ ਦਾ ਸਾਹਮਣਾ ਵੀ ਕਰਨਾ ਪੈ ਰਿਹਾ ਸੀ।
ਮੁੱਖ ਰਿੱਟ ਪਟੀਸ਼ਨਰ ਡਾ. ਜਗਵਿੰਦਰ ਸਿੰਘ ਵਿਰਕ ਨੇ ਗੱਲਬਾਤ ਕਰਦਿਆਂ ਦੱਸਿਆ ਕਿ ਉਹ ਕਾਰਬਨ ਟੈਕਸ ਆਮ ਲੋਕਾਂ ਤੇ ਛੋਟੇ ਵਿਉਪਾਰੀਆਂ-ਕਾਰੋਬਾਰੀਆਂ ਉਪਰ ਲਾਗੂ ਕਰਨ ਦੇ ਵਿਰੁੱਧ ਸਨ। ਇਹ ਟੈਕਸ ਪੱਕੇ ਤੌਰ ’ਤੇ ਰੱਦ ਕਰਵਾਉਣ ਲਈ ਉਨ੍ਹਾਂ ਨੇ ਆਪਣੇ ਸਹਿਯੋਗੀਆਂ ਨਾਲ ਕਾਨੂੰਨੀ ਸਲਾਹ-ਮਸ਼ਵਰਾ ਕੀਤਾ ਅਤੇ ਕਰੀਬ 1500 ਵਿਅਕਤੀਆਂ ਦੇ ਦਸਤਖਤ ਕਰਵਾ ਕੇ ਸਰਕਾਰ ਅੱਗੇ ਜਨਹਿੱਤ ਪਟੀਸ਼ਨ ਦਾਇਰ ਕਰ     ਦਿੱਤੀ ਸੀ।
ਉਨ੍ਹਾਂ ਦੱਸਿਆ ਕਿ ਪ੍ਰਧਾਨ ਮੰਤਰੀ ਨੇ ਇਸ ਪਟੀਸ਼ਨ ਨੂੰ ਵਾਚਣ ਉਪਰੰਤ ਆਪਣਾ ਨਿਰਣਾ ਲੈਂਦਿਆਂ ਕਾਰਬਨ ਟੈਕਸ ਬੀਤੀ ਪਹਿਲੀ ਜੁਲਾਈ 2014 ਤੋਂ ਖਤਮ ਕਰ ਦਿੱਤਾ ਹੈ। ਇਸ ਨਾਲ ਬਿਜਲੀ ਤੇ ਗੈਸ ਦੀਆਂ ਕੀਮਤਾਂ ਵਿੱਚ 21 ਫੀਸਦੀ ਕਮੀ ਆਵੇਗੀ। ਡਾ. ਵਿਰਕ ਨੇ ਪ੍ਰਧਾਨ ਮੰਤਰੀ ਟੋਨੀ ਐਬਟ ਦੇ ਦਸਤਖਤਾਂ ਵਾਲਾ ਪੱਤਰ ਵੀ ਦਿਖਾਇਆ ਜੋ ਕਿ ਉਨ੍ਹਾਂ (ਵਿਰਕ) ਨੂੰ ਸੰਬੋਧਨ ਕਰਦਿਆਂ ਲਿਖਿਆ ਗਿਆ ਹੈ ਕਿ ਆਸਟਰੇਲੀਅਨ ਸਰਕਾਰ ਨੇ ਕਾਰਬਨ ਟੈਕਸ ਪੂਰੀ ਤਰ੍ਹਾਂ ਖਤਮ ਕਰ ਦਿੱਤਾ ਹੈ।
ਕਈਆਂ ਦਾ ਕਹਿਣਾ ਹੈ ਕਿ ਆਮ ਲੋਕਾਂ ਲਈ ਹਊਆ ਬਣਾ ਕੇ ਪੇਸ਼ ਕੀਤੇ ਗਏ ਕਾਰਬਨ ਟੈਕਸ ਨੂੰ ਵਾਪਸ ਲੈ ਕੇ ਸਰਮਾਏਦਾਰਾਂ ਦੀ ਪਿੱਠ ਠੋਕੀ ਗਈ ਹੈ। ਵਾਤਾਵਰਨ ਪ੍ਰੇਮੀ ਤੇ ਅਮਰੀਕਾ ਦੇ ਸਾਬਕਾ ਪ੍ਰਧਾਨ ਅਲ ਜੋਰੀ ਨੇ ਆਸਟਰੇਲੀਆ ਸਰਕਾਰ ਦੇ ਕਾਰਬਨ ਟੈਕਸ ਨੂੰ ਖਤਮ ਕਰਨ ਦੇ ਫੈਸਲੇ ਨੂੰ ਨਿਰਾਸ਼ਾਜਨਕ ਕਦਮ ਦੱਸਿਆ ਹੈ। ਉਨ੍ਹਾਂ ਕਿਹਾ ਕਿ ਆਸਟਰੇਲੀਆ, ਕਾਰਬਨ ਨੂੰ ਘਟਾਉਣ, ਸਾਫ ਵਾਤਵਰਨ ਅਤੇ ਖੁਸ਼ਹਾਲ ਭਵਿੱਖ ਦੀ ਆਲਮੀ ਕੋਸ਼ਿਸ਼ ਅੱਗੇ ਵੱਡੇ ਉਦਯੋਗਿਕ ਘਰਾਣਿਆਂ ਦਾ ਪਿੱਛਲੱਗ ਬਣ ਗਿਆ ਹੈ।


ਆਸਟਰੇਲੀਅਨ ਆਵਾਸ ਵਿਭਾਗ ਵੱਲੋਂ

28 ਪੰਜਾਬੀ ਨੌਜਵਾਨ ਗ੍ਰਿਫ਼ਤਾਰ


ਮੈਲਬਰਨ, 21 ਜੁਲਾਈ - ਆਸਟਰੇਲੀਆ ਦੇ ਆਵਾਸ ਵਿਭਾਗ ਨੇ ਕਰੀਬ 28 ਪੰਜਾਬੀ ਨੌਜਵਾਨਾਂ ਨੂੰ ਵੀਜ਼ਾ ਸ਼ਰਤਾ ਪੂਰੀਆਂ ਨਾ ਕਰਨ ਅਤੇ ਆਵਾਸ ਵਿਭਾਗ ਦੇ ਨਿਯਮਾਂ ਦੀ ਉਲੰਘਣਾ ਕਰਨ ਦੋਸ਼ ਹੇਠ ਹਿਰਾਸਤ ਵਿੱਚ ਭੇਜ ਦਿੱਤਾ ਹੈ। ਮੈਲਬਰਨ ਦੇ ਵੱਖ- ਵੱਖ ਇਲਾਕਿਆਂ ’ਚ ਵਿਭਾਗ ਵੱਲੋਂ ਛਾਪੇਮਾਰੀ ਦੌਰਾਨ ਇਨ੍ਹਾਂ ਨੌਜਵਾਨਾਂ ਨੂੰ ਹਿਰਾਸਤ ਵਿੱਚ ਲਿਆ ਗਿਆ।
ਸ਼ਹਿਰ ਵਿੱਚ ਕੰਮਕਾਜ ਵਾਲੀਆਂ ਥਾਵਾਂ, ਫੈਕਟਰੀਆਂ ਆਦਿ ਸਮੇਤ ਇਹ ਕਾਰਵਾਈ ਟੈਕਸੀ ਡਰਾਈਵਰਾਂ ’ਤੇ ਵੀ ਅਮਲ ਵਿੱਚ ਲਿਆਂਦੀ ਗਈ ਹੈ। ਪ੍ਰਾਪਤ ਜਾਣਕਾਰੀ ਮੁਤਾਬਕ ਇਸੇ ਕਾਰਵਾਈ ਤਹਿਤ ਨਜ਼ਰਬੰਦ ਕੀਤੇ ਗਏ ਪੰਜਾਬ ਨਾਲ ਸਬੰਧਤ  ਮਨਦੀਪ ਸਿੰਘ ਨੂੰ ਟੈਕਸੀ ਚਲਾਉਂਦਿਆਂ ਮੌਕੇ ’ਤੇ ਕੀਤੀ ਗਈ ਪੁੱਛਗਿੱਛ ਮਗਰੋਂ ਵੀਜ਼ਾ ਰੱਦ ਕਰਕੇ ਹਿਰਾਸਤ ਕੇਂਦਰ ਭੇਜ ਦਿੱਤਾ ਗਿਆ ਹੈ, ਏਜੰਟ ਵੱਲੋਂ ਡਾਲਰਾਂ ਦਾ ਲਾਲਚ ਦੇ ਕੇ ਮਾਰੀ ਠੱਗੀ ਕਾਰਨ ਮਨਦੀਪ ਇਸ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰ ਰਿਹਾ ਹੈ। ਰਿਹਾ ਹੈ। ਇਸ ਨੌਜਵਾਨ ਕੋਲ ਸਪਾਂਸਰਸ਼ਿਪ ਵੀਜ਼ਾ ਸੀ ਜਿਸ ਤਹਿਤ ਸਬੰਧਤ ਅਦਾਰੇ ਨਾਲ ਹੀ ਦੋ ਸਾਲ ਕੰਮ ਕਰਨ ਦੀ ਵਿਭਾਗ ਵੱਲੋਂ ਲਾਈ ਸ਼ਰਤ ਲਾਗੂ ਹੁੰਦੀ ਹੈ।  ਕੰਮਕਾਜ ’ਚ ਮੰਦੀ ਦੇ ਚੱਲਦਿਆਂ ਏਜੰਟ ਸਮੇਤ  ਸਪਾਂਸਰਸ਼ਿਪ ਦੇ ਕਰਜ਼ੇ ਨੂੰ ਲਾਹੁਣ ਲਈ ਮਨਦੀਪ ਟੈਕਸੀ  ਚਲਾਉਣ ਲੱਗਿਆ ਸੀ ਪਰ ਇਸ ਛਾਪੇਮਾਰੀ ਦੌਰਾਨ ਹੁਣ ਉਸ ਦਾ ਵੀਜ਼ਾ ਹੀ ਰੱਦ ਕਰ ਦਿੱਤਾ ਗਿਆ ਹੈ। ਮਨਦੀਪ 6 ਸਾਲ ਪਹਿਲਾਂ ਅੇਅਰਡਰੈਸਿੰਗ ਦੇ ਕੋਰਸ ’ਚ ਪੰਜਾਬ ਤੋਂ ਆਸਟਰੇਲੀਆ ਆਇਆ ਸੀ।     ਆਵਾਸ ਨਿਯਮਾਂ ਦੀ ਘੁੰਮਣਘੇਰੀ ’ਚ ਫਸੇ ਇਨ੍ਹਾਂ ਪੰਜਾਬੀ ਨੌਜਵਾਨਾਂ ਨੂੰ ਸ਼ਹਿਰ ਨੇੜਲੇ ਮੈਰੀਬਰਨੌਂਗ  ਆਵਾਸ ਹਿਰਾਸਤ ਕੇਂਦਰ ’ਚ ਰੱਖਿਆ ਗਿਆ ਹੈ। ਪ੍ਰਾਪਤ ਜਾਣਕਾਰੀ ਮੁਤਾਬਕ ਇਨ੍ਹਾਂ ਨੌਜਵਾਨਾਂ ਨੂੰ ਕਾਨੂੰਨੀ ਤੌਰ ’ਤੇ ਆਪਣਾ ਪੱਖ ਰੱਖਣ ਦੀ ਇਜਾਜ਼ਤ ਦਿੱਤੀ ਜਾ ਰਹੀ ਹੈ ਪਰ ਵੀਜ਼ਾ ਰੱਦ ਹੋਣ  ਦੇ ਮਾਮਲੇ ’ਚ ਭਾਰਤ ਵਾਪਸ ਭੇਜੇ ਜਾਣ ਦੀ ਸੰਭਾਵਨਾ ਹੈ। ਆਵਾਸ ਵਿਭਾਗ ਵੱਲੋਂ ਅਜਿਹੀ ਕਾਰਵਾਈ ਖੇਤਰੀ ਇਲਾਕਿਆਂ ’ਚ ਵੀ ਕੀਤੀ ਜਾ ਰਹੀ ਹੈ


ਇਸਰਾਈਲ ਵੱਲੋਂ ਗਾਜ਼ਾ ਪੱਟੀ

’ਤੇ ਜ਼ਮੀਨੀ ਹਮਲਾ ਸ਼ੁਰੂ
* ਪੈਦਲ ਸੈਨਾ ਤੇ ਇਸਰਾਇਲੀ ਟੈਂਕ ਗਾਜ਼ਾ ਪੱਟੀ ’ਚ ਵੜੇ
* ਅੱਧੀ ਰਾਤ ਦੇ ਹਮਲੇ ਵਿੱਚ 24 ਫਲਸਤੀਨੀ, ਇਕ ਇਸਰਾਇਲੀ ਸੈਨਿਕ ਹਲਾਕ


ਗਾਜ਼ਾ/ਯੋਰੋਸ਼ਲੱਮ, 19 ਜੁਲਾਈ - ਇਸਰਾਈਲ ਨੇ ਅੱਜ ਪੰਜ ਸਾਲ ਵਿੱਚ ਪਹਿਲੀ ਵਾਰ ਹਮਾਸ ਦੇ ਸ਼ਾਸਨ ਵਾਲੀ ਗਾਜ਼ਾ ਪੱਟੀ ਵਿੱਚ ਪੈਦਲ ਸੈਨਾ ਤੇ ਟੈਂਕਾਂ ਨਾਲ ਜ਼ਮੀਨੀ ਹਮਲਾ ਸ਼ੁਰੂ ਕਰ ਦਿੱਤਾ ਹੈ। ਪਿਛਲੇ ਦਸ ਦਿਨਾਂ ਤੋਂ ਚੱਲ ਰਹੀ ਜੰਗ ਵਿੱਚ ਇਸ ਵੱਲੋਂ ਹੁਣ ਤਕ ਗਾਜ਼ਾ ਵਿੱਚ ਕੀਤੇ ਗਏ ਹਵਾਈ ਹਮਲਿਆਂ ਵਿੱਚ 265 ਫਲਸਤੀਨੀ ਮਾਰੇ ਜਾ ਚੁੱਕੇ ਹਨ, ਪਰ ਇਹ ਖਾੜਕੂਆਂ ਵੱਲੋਂ ਯਹੂਦੀ ਮੁਲਕ ’ਤੇ ਕੀਤੇ ਜਾ ਰਹੇ ਰਾਕੇਟ ਹਮਲੇ ਨਹੀਂ ਰੋਕ ਸਕਿਆ।
ਇਸਰਾਈਲੀ ਬਲਾਂ ਨੇ ਪੈਦਲ ਸੈਨਾ ਤੇ ਹਵਾਈ ਹਮਲਿਆਂ ਨਾਲ ਜ਼ਮੀਨੀ ਹਮਲਾ ਆਰੰਭ ਕਰਦਿਆਂ ਕਿਹਾ ਕਿ ਇਸ ਦਾ ਮੰਤਵ ਹਮਾਸ ਦੇ ਦਹਿਸ਼ਤਗਰਦੀ ਦੇ ਬੁਨਿਆਦੀ ਢਾਂਚੇ ਨੂੰ ਵੱਡੀ ਸੱਟ ਮਾਰਨਾ ਹੈ। ਇਸਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਦਾ ਕਹਿਣਾ ਹੈ ਕਿ ਫੌਜ ਹਮਾਸ ਦੇ ਸੁਰੰਗਾਂ ਦੇ ਨੈੱਟਵਰਕ ਨੂੰ ਤੋੜਨ ਦੇ ਯਤਨ ਵਿੱਚ ਹੈ, ਜੋ ਇਹ ਹਵਾਈ ਹਮਲਿਆਂ ਰਾਹੀਂ ਨਹੀਂ ਕਰ ਸਕੀ। ਰਾਤੀਂ ਹਜ਼ਾਰਾਂ ਸੈਨਿਕ ਗਾਜ਼ਾ ਦੇ ਵੱਖ-ਵੱਖ ਹਿੱਸਿਆਂ ਵੱਲ ਟੈਂਕਾਂ ਸਮੇਤ ਵਧੇ।
ਹਮਾਸ ਨੇ ਇਸਰਾਈਲ ਨੂੰ ਚਿਤਾਵਨੀ ਦਿੱਤੀ ਹੈ ਕਿ ਇਸ ਨੂੰ ਜ਼ਮੀਨੀ ਹਮਲੇ ਦਾ ਭਾਰੀ ਮੁੱਲ ਤਾਰਨਾ ਪਏਗਾ। ਇਸਰਾਈਲ ਦੀ ਫੌਜ ਵੱਲੋਂ ਜਾਰੀ ਇਕ  ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਹਮਾਸ ਵੱਲੋਂ ਜ਼ਮੀਨ, ਹਵਾ ਤੇ ਸਮੁੰਦਰੀ ਪਾਸਿਓਂ ਪਿਛਲੇ 10 ਦਿਨਾਂ ਤੋਂ ਕੀਤੇ ਜਾ ਰਹੇ ਹਮਲਿਆਂ ਅਤੇ ਤਣਾਅ ਘੱਟ ਕਰਨ ਲਈ ਇਸ ਨੂੰ ਵਾਰ-ਵਾਰ ਕੀਤੀਆਂ ਗਈਆਂ ਪੇਸ਼ਕਸ਼ਾਂ ਇਸ ਵੱਲੋਂ ਰੱਦ ਕੀਤੇ ਜਾਣ ਮਗਰੋਂ ਇਸਰਾਈਲ ਡਿਫੈਂਸ ਫੋਰਸਿਜ਼ ਨੇ ਗਾਜ਼ਾ ਪੱਟੀ ਵਿੱਚ ਜ਼ਮੀਨੀ ਹਮਲਾ ਸ਼ੁਰੂ ਕੀਤਾ ਹੈ।
ਆਈਡੀਐਫ ਅਨੁਸਾਰ ‘‘ਇਸ ਹਮਲੇ ਦਾ ਮੰਤਵ, ਅਜਿਹਾ ਮਾਹੌਲ ਕਾਇਮ ਕਰਨਾ ਹੈ ਜਿਸ ਵਿੱਚ ਇਸਰਾਈਲ ਵਾਸੀ ਸੁਰੱਖਿਅਤ ਤੇ ਠੀਕ-ਠਾਕ ਰਹਿ ਸਕਣ ਤੇ ਅੰਨ੍ਹੇਵਾਹ ਦਹਿਸ਼ਤਗਰਦੀ ਦਾ ਖ਼ੌਫ਼ ਉਨ੍ਹਾਂ ਦੇ ਮਨਾਂ ਵਿੱਚ ਨਾ ਰਹੇ।’’ ਇਸਰਾਈਲੀ ਸੈਨਾ ਦੇ ਤਰਜਮਾਨ ਜਨਰਲ ਮੋਤੀ ਅਲਗੋਜ਼ ਨੇ ਗਾਜ਼ਾ ਦੇ ਵਾਸੀਆਂ ਨੂੰ ਅਪੀਲ ਕੀਤੀ ਕਿ ਉਹ ਫੌਜ ਦੇ ਅਪਰੇਸ਼ਨ ਵਾਲੇ ਖੇਤਰ ਖਾਲੀ ਕਰ ਦੇਣ। ਇਹ ਅਪਰੇਸ਼ਨ ਲੋੜ ਮੁਤਾਬਕ ਵਧਾਇਆ ਜਾਏਗਾ।
ਅੱਧੀ ਰਾਤ ਮਗਰੋਂ ਤੋਂ ਇਸਰਾਈਲੀ ਫਾਇਰਿੰਗ ਵਿੱਚ 24 ਫਲਸਤੀਨੀ ਮਾਰੇ ਜਾ ਚੁੱਕੇ ਹਨ ਜਿਨ੍ਹਾਂ ਵਿੱਚ ਤਿੰਨ ਕਿਸ਼ੋਰ ਤੇ ਇਕ ਪੰਜ ਮਹੀਨੇ ਦਾ ਬੱਚਾ ਵੀ ਸ਼ਾਮਲ ਹੈ ਤੇ ਇਸ ਤਰ੍ਹਾਂ 8 ਜੁਲਾਈ ਤੋਂ ਸ਼ੁਰੂ ਹੋਏ ਹਮਲਿਆਂ ਵਿੱਚ ਗਾਜ਼ਾ ਦੇ ਕੁੱਲ 265 ਲੋਕ ਮਾਰੇ ਜਾ ਚੁੱਕੇ ਹਨ। ਰਾਤੀਂ ਚੱਲੀ ਭਾਰੀ ਲੜਾਈ ਦੌਰਾਨ ਗਾਜ਼ਾ ਪੱਟੀ ’ਚ ਇਕ ਇਸਰਾਈਲੀ ਸੈਨਿਕ ਮਾਰਿਆ ਗਿਆ।
ਮਿਸਰ ਦੇ ਵਿਦੇਸ਼ ਮੰਤਰੀ ਸਾਮੇਤ ਸ਼ੌਕਰੀ ਨੇ ਕਿਹਾ ਕਿ ਜੇਕਰ ਹਮਾਸ ਨੇ ਉਨ੍ਹਾਂ ਦੀ ਤਜਵੀਜ਼ ਮੰਨੀ ਹੁੰਦੀ ਤਾਂ ਘੱਟੋ-ਘੱਟ 40 ਫਲਸਤੀਨੀਆਂ ਦੀਆਂ ਜਾਨਾਂ ਬਚਾਈਆਂ ਜਾ ਸਕਦੀਆਂ ਹਨ।
ਇਸਰਾਈਲ ਨੇ ਹੋਰ ਵੀ ਫੌਜੀ ਇਸ ਜੰਗ ’ਚ ਲਾ ਲਏ ਹਨ। ਸੰਯੁਕਤ ਰਾਸ਼ਟਰ ਦੇ ਸਕੱਤਰ ਬਾਨ ਕੀ ਮੂਨ ਨੇ ਇਸਰਾਈਲ ਵੱਲੋਂ ਜ਼ਮੀਨੀ ਹਮਲਾ ਕਰਨ ’ਤੇ ਅਫਸੋਸ ਪ੍ਰਗਟਾਇਆ ਹੈ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਵੱਲੋਂ ਵਾਰ-ਵਾਰ ਵਰਜੇ ਜਾਣ ਉੱਤੇ ਅਤੇ ਕੌਮਾਂਤਰੀ ਆਗੂਆਂ ਦੇ ਕਹਿਣ ਦੇ ਬਾਵਜੂਦ ਇਹ ਖਤਰਨਾਕ ਸਥਿਤੀ ਹੋਰ ਵਿਗੜ ਚੱਲੀ ਹੈ। ਉਨ੍ਹਾਂ ਨੇ ਇਸਰਾਈਲ ਨੂੰ ਜਾਨੀ ਨੁਕਸਾਨ ਤੋਂ ਗੁਰੇਜ਼ ਕਰਨ ਲਈ ਕਿਹਾ ਹੈ।


ਪੁਰਾਣੇ ਦੋਸਤਾਂ ਵੱਲ ਹੱਥ

ਵਧਾਉਣ ਲੱਗਿਆ ਰੂਸ


ਮੈਨਾਗੁਆ, 13 ਜੁਲਾਈ - ਪੱਛਮੀ ਦੇਸ਼ਾਂ ਨਾਲ ਰੂਸ ਦੇ ਸਬੰਧ ਵਿਗੜੇ ਹੋਏ ਹਨ ਅਤੇ ਰਾਸ਼ਟਰਪਤੀ ਵਲਾਦੀਮੀਰ ਪੂੁਤਿਨ ਲਾਤੀਨੀ ਅਮਰੀਕਾ ਵਿੱਚ ਰੂਸ ਦੀ ਪੈਂਠ ਜਮਾਉਣ ਲਈ ਦੌਰੇ ’ਤੇ ਹਨ। ਇਸੇ ਦੌਰਾਨ ਰੂਸ ਦੇ ਲੰਮੇ ਸਮੇਂ ਦੇ ਮਿੱਤਰ ਕਿਊਬਾ ਦੇ ਦੌਰੇ ਤੋਂ ਬਾਅਦ ਉਹ ਨਿਕਾਰਾਗੁਆ ’ਚ ਵੀ ਰੁਕੇ ਹਨ ਜਿਸ ਨਾਲ ਕਈਆਂ ਨੂੰ ਹੈਰਾਨੀ ਵੀ ਹੋਈ ਹੈ।ਆਪਣੇ ਛੇ ਰੋਜ਼ਾ ਦੌਰੇ ਦੌਰਾਨ ਰਾਸ਼ਟਰਪਤੀ ਪੂਤਿਨ ਅਰਜਨਟੀਨਾ ਅਤੇ ਬ੍ਰਾਜ਼ੀਲ ਵੀ ਜਾਣਗੇ ਜਿੱਥੇ ਉਹ ਆਰਥਿਕ ਤੌਰ ’ਤੇ ਉਭਰ ਰਹੇ ਦੇਸ਼ਾਂ ਦੇ ਗਰੁੱਪ ‘ਬਰਿਕਸ’ ਦੇ ਸਿਖਰ ਸੰਮੇਲਨ ’ਚ ਹਿੱਸਾ ਲੈਣਗੇ। 1980ਵਿਆਂ ਵਿੱਚ ਸੈਂਡੀਕਿਸਟਾ ਸ਼ਾਸਨ ਵੇਲੇ ਨਿਕਾਰਾਗੁਆ ਦੀ ਰੂਸ ਨਾਲ ਗੂੜ੍ਹੀ ਸਾਂਝ ਸੀ। ਖੱਬੇਪੱਖੀ ਰਾਸ਼ਟਰਪਤੀ ਡੇਨੀਅਲ ਓਰਟੇਗਾ ਹਵਾਈ ਅੱਡੇ ਉਪਰ ਆਪਣੀ ਪਤਨੀ ਅਤੇ ਨਿਕਾਰਾਗੁਆ ਦੀ ਫੌਜ ਦੇ ਮੁਖੀ ਸਹਿਤ ਰਾਸ਼ਟਰਪਤੀ ਪੂਤਿਨ ਦਾ ਸਵਾਗਤ ਕੀਤਾ। ਸ੍ਰੀ ਓਰਟੇਗਾ ਨੇ ਹਵਾਈ ਅੱਡੇ ’ਤੇ ਪੱਤਰਕਾਰਾਂ ਨੂੰ ਦੱਸਿਆ, ‘‘ਪਹਿਲੀ ਵਾਰ ਰੂਸੀ ਰਾਸ਼ਟਰਪਤੀ ਨਿਕਾਰਾਗੁਆ ਆਏ ਹਨ।’’ ਸ੍ਰੀ ਪੂਤਿਨ ਦੇ ਦੁਭਾਸ਼ੀਏ ਨੇ ਦੱਸਿਆ ਕਿ ਉਨ੍ਹਾਂ ਦੀ ਸਰਕਾਰ ਨਿਕਾਰਾਗੁਆ ਨਾਲ ਆਰਥਿਕ ਸਬੰਧ ਮਜ਼ਬੂਤ ਕਰਨ ਦੀ ਇਛੁੱਕ ਹੈ। ਸ੍ਰੀ ਪੂਤਿਨ ਨੇ ਆਪਣੇ ਦੌਰੇ ’ਤੇ ਪਹਿਲਾਂ ਕਿਹਾ ਸੀ ਕਿ ਲਾਤੀਨੀ ਅਮਰੀਕਾ ਵਿੱਚ ਤੇਲ ਅਤੇ ਬਾਲਸਾਈਟ ਦੇ ਭੰਡਾਰ ਹਨ ਅਤੇ ਉਹ ਖੇਤਰੀ ਆਗੂਆਂ ਕੋਲ ਨਿਵੇਸ਼ ਅਤੇ ਵਪਾਰ ਵਧਾਉਣ ਦੀਆਂ ਤਜਵੀਜ਼ਾਂ ਪੇਸ਼ ਕਰਨਗੇ। ਸਮੀਖਿਆਕਾਰਾਂ ਦਾ ਕਹਿਣਾ ਹੈ ਕਿ ਪੂਤਿਨ ਬ੍ਰਸਲਜ਼ ਅਤੇ ਵਾਸ਼ਿੰਗਟਨ ਨੂੰ ਠਿੱਠ ਕਰਨ ਲਈ ਆਪਣੇ ਇਸ ਦੌਰੇ ਦੀ ਵਰਤੋਂ ਕਰ ਰਹੇ ਹਨ। ਯੂਕਰੇਨ ਨੇ ਕ੍ਰੀਮੀਆ ਖਿੱਤੇ ਉਪਰ ਰੂਸ ਪੱਖੀ ਵੱਖਵਾਦੀਆਂ ਦੇ ਕਾਬਜ਼ ਹੋਣ ਤੋਂ ਬਾਅਦ ਅਮਰੀਕਾ ਅਤੇ ਪੱਛਮੀ ਦੇਸ਼ਾਂ ਨੇ ਰੂਸ ’ਤੇ ਆਰਥਿਕ ਪਾਬੰਦੀਆਂ ਲਗਾ ਦਿੱਤੀਆਂ ਸਨ।



<< Start < Prev 1 2 3 4 5 6 7 8 9 10 Next > End >>

ਮੁੱਖ ਖ਼ਬਰਾਂ : 

ਖੇਡ ਖ਼ਬਰਾ : 

ਪੰਜਾਬ ਖ਼ਬਰਾਂ : 

ਨਵੇਂ ਲੇਖ : 

 

Random Video 

Latest Added Magzine 

Advertisement

Advertisement
Advertisement
Advertisement